ឯកឧត្តម នាយឧត្តមសេនីយ៍ ប៉ោ ភក្តិ រដ្ឋលេខាធិការក្រសួងមហាផ្ទៃ និងជាប្រធាន ក្រុមការងារSOMTC-កម្ពុជា កាលពីថ្ងៃទី២៨ ខែកុម្ភៈ ឆ្នាំ២០២៥ បានអញ្ជេីញចូលរួមកិច្ចប្រជុំរួមនៃលេខាធិការដ្ឋានក្រុមប្រឹក្សាសហគមន៍អាស៊ានទាំងបី និងកិច្ចពិភាក្សាក្រោមសសរស្តម្ភនយោបាយ-សន្តិសុខ ស្តីពីកិច្ចការនានាពាក់ព័ន្ធនឹងបញ្ហាសន្តិសុខអាស៊ាន ព្រមទាំងធ្វេីបទបង្ហាញស្តីពីវឌ្ឍនភាពការងារអាស៊ានក្រោមសមត្ថកិច្ចក្រសួងមហាផ្ទៃ នៅទីស្តីការក្រសួងការបរទេស និងសហប្រតិបត្តិការអន្តរជាតិ ក្រោមអធិបតីភាព ឯកឧត្តម ប្រាក់ សុខុន ឧបនាយករដ្ឋមន្រ្តី រដ្ឋមន្រ្តីក្រសួងការបរទេស និងសហប្រតិបត្តិការអន្តរជាតិ ក្នុងពិធីបេីក និងបន្តសម្របសម្រួលដោយ ឯកឧត្តម គង់ ភោគ រដ្ឋលេខាធិការ ក្រសួងការបរទេស និងសហប្រតិបត្តិការអន្តរជាតិ និងជាឧត្តមមន្ត្រីអាស៊ានរបស់កម្ពុជា។ 

កិច្ចប្រជុំនេះ មានការចូលរួមពីក្រសួងស្ថាប័នពាក់ព័ន្ធ ដែលស្ថិតក្រោមសសរស្តម្ភសហគមន៍អាស៊ានទាំងបី និងមានគោលបំណងផ្លាស់ប្តូរមតិយោបល់ និងធ្វើបច្ចុប្បន្នភាពអំពីអាទិភាពគន្លឹះនានា និងគំនិតផ្តួចផ្តើមផ្សេងៗ ពាក់ព័ន្ធនឹងការចូលរួមចំណែករបស់កម្ពុជា ក្នុងកិច្ចខិតខំប្រឹងប្រែងកសាងសហគមន៍អាស៊ាន។